Griaß eich Godd ihr liabe Leid
jedsd isch´s wieder mol so weid,
dass i, ob e will oder nedd,
ebbes zom verzähla hedd.
zom zehnda mol isch des jedsad schau,
dass i so Versla vordraga hau,
vo oseram Doa on Macha rondom,
hald so om osern Flegga rom.
I han berichtet vo viele Sacha,
on was manche Leid oos äls henich machat.
Wennn mar was hemachd em Ibermuad,
no gfälld os des iberhaupt nedd guad.
Doch mir machad hald oefach weider em Tegschd,
on senn geschbannd, was isch wohl s`Nächschd.
I han eich verzähld vom Heggagaipfad,
on was es so midd ehm uff sich hadd.
Doch mit dar Zeit hodd sich des gwandeld,
stiafmidderlich hodd mar ihn jedsd behandelt.
Er war hald z´lang, mid z´viel Asphalt,
drom lässd mr ihn jedsd falla hald.
Do druff han i eich no berichded,
dass mir jedsd neie Wanderweg briechded.
Mar hodd des glei en Agriff gnomma,
on isch äll Johr a weng weider komma.
Es hodd no scho a bar Jährla daurad,
weil Detail ofd a Deifale laurad.
Doch noch ra Zeit, s´wär doch gelacht,
hen mir dia Weg zuwege bracht.
Em ledschda Johr dann wared joo
dia neie Wanderdäfala endlich do.
Dia mir au midd vorbereideat henn,
weil mir jo Wegmenedscher senn.
Wia i eich einschd ao vordraga hau
schliaßlich hedd mar´s dronder nedd dau.
I hau domols au uff des Gehald agschbield,
no hodd mir oiner ganz komisch aagschielt.
Doch mir senn au soo ganz guad durch gekomma,
weil schliaßlich on em Grond genomma,
machad mir des Gschäft mit de Rauda on Pfeil
bloß gega aufkommende Langweil.
Des isch nadierlich so nedd ganz richdig,
on dass mir moened mir wärad rechd wichdig,
wean mir vom Schuldes au no geehrt,
an ganza Korb vool Sach war en des wert.
No ebbes will i jedsd vermelda,
weil sowas isch doch eher selda:
Em Schwarzwaldverinsheft Numero drei
word berichtet vo dar Dochtlamer Schäferei.
Schäferstündchen hoesd der Ardiggl,
on verzähld was hender oosare Biggl
älls so basierd en Feld ond Wald,
a neies Liad isch´s nedd, es isch des ald.
Doch zom Berichd seinem End
hodd mar onser Landtour "Schafspuren" erwänd.
Gsagd wurd aber blos, dass se da richdiga Nama hedd,
iber d Tour selber eißert mar sich leider nedd.
Em Gmeinde-Jahresrückblick, deam neia
berichdad mar, dass nedd bloß em Laia,
sondern om da Flegga rom zur Zeid
es Landtuorwanderwege geid.
On so verbreided sich die Kunde,
vo oserer Schofspura- on Venusbergronde.
Ab sofort be i jedzd a mol schdill
weil no ebber anderer schwädsa will.
I winsch eich no a guade Zeid uff dera Weld,
on bleibad brav, wenn´s au schwer fälld!!!!